حوار غريب ومثير مع مصطفى جعفر

قد يسالني احدكم عن سر هذه المقدمة الطويلة واسبابها ...الاجابه يا حضرات ان اعتذار جعفر لم يغلق الملف لانه باختصار لا يتعلم من اخطائه ولن تكون مشكلته الاخيرة هى الاخيرة لان جعفر بادرني مساء الجمعة بقوله :انا لو ملعبتش ماتش الاهلي يبقي الزمالك عاوز يبطلني كورة
بدات افكر مره ثانيه في نشر الحوارمساء الجمعة واسترجعت كل زكرياتي مع هذا اللاعب منذ قدومه للزمالك وتساءلت بيني وبين نفسي لماذا لم يعد لمصطفي جعفر صديقا حتي الان؟ واكتشفت ان جعفر لم يصادق سوي يوسف حمدي والغريب ان يوسف حمدي لم يحضر حفل زفافه وتذكرت ان جعفر كان على علاقة جيدة بعلاء عبدالغني لكنه لم يزور علاء في المستشفي ولم يحضر علاء حفل زفاف جعفر.
تذكرت في النهاية ان كل ذنب الزمالك انه دفع مستحقات تامر النحاس والذي بأمكانه ان يوقف جعفر وان اللاعب يعترض على خصم 30 الف جنيه سنويا من جملة مستحقات النحاس اضافه الى مبالغ اخري على سبيل العقوبات الماليه..الغريب اني وجدت جعفر في كلماته لا يبالي باي شيء سوي ان رئيس النادي يمنح المال لبعض اللاعبين والمفروض من وجهة نظر جعفر ان يحصل هو الاخر على المال من رئيس النادي
باختصار ومن غير لف او دوران تعالو نعرف تفاصيل الحوار الذى كنت انوى تاجيله الى مابعد مباراة القمة ولكن مفاجاة استبعاده من اللقاء جعلتنى اعده سريعا دون ان انتظر التوابع فى الايام المقبلة:

مصطفي انت ايه حكايتك بالظبط ؟
حكاية ايه؟...ولاحكاية ولا رواية شكلي مش حلعب ماتش الاهلي .

يا مصطفي ده طبيعي وجايز جدا استبعادك انت راجع من مشكلة كان المفروض يتحقق معاك او على الاقل حرام حصولك على نصيب احد؟
مفيش حاجه اسمها طبيعي في الزمالك..اجوجو عامل مشاكل وحمزه عامل مشاكل وانا لست اقل من عبدالحليم او شريف اشرف علشان اكون المهاجم الخامس في الزمالك.

لكن انت بتتكلم عن ناس سافرت مش ناس هربت ؟
انا لم اهرب انا طالبت بحقوقي... وبعدين اللي سافروا عملوا ايه يعني ؟... اتغلبو ثلاثة

انت شمتان ولا تقصد ان وجودك كان ممكن يغير النتيجة ؟
ماتوقعنيش في الغلط وتديهم فرصة يبطلوني كورة ... انا عاوز اوضح شيء هام جدا .. انا لم اهرب لكن بطالب بحقوقي

ممكن اعرف ماهي حقوقك؟
حقوقي المالية ... ازاي يخصموا مني على الفاضي والمليان

لكن انا اعرف انها فلوس النحاس وقيمة عقوبات بسبب تصريحاتك ضد محمد حلمي المدرب السابق
فلوس النحاس انا حر ادفعها او ارفض دفعها.. محدش قال للزمالك يدفعها ويرجع يخصمها مني ..والكابتن محمد حلمي قال انه متنازل عن حقوقه ومشكلتي معاه انتهت

لكن النحاس سبق وان اوقفك لولا تدخل الزمالك ؟
ماشي لكن مش معني كده ان الزمالك يدفع له حقوقه مرة واحدة.. انا اتفقت معاه ادفع له 30 الف جنيه في الموسم لكن الزمالك دفع الفلوس دفعة واحدة.

المهم يا جعفر انه بيخصم منك 30 الف جنيه فقط زعلان ليه بقى؟
لانه بيخصم في اوقات غير مناسبة انا راجل عندي مسئوليات ومينفعش يخصموا بمزاجهم
ايه حكاية هجومك علي رئيس النادي؟
محصلش... كل ما في الامر اني قولت رئيس النادي وعدني بمائة الف جنيه ولم يلتزم بوعدة معايا

وهل رئيس النادي مجبر يدفع لك يا جعفر ؟
مش موضوع مجبر.. موضوع ان فيه لعيبة بتغيظني وبيقولوا انهم قبضوا منه ... اشمعنى انا يعني

مصطفي.. سمعت عن علي خليل؟
اه طبعا.. اعرف انه كان فرود جامد قوي لكن الزمالك مكنش بيعامله كويس وساب النادي ومشي والناس بتشبهنى بيه

وانت ناوي تمشي؟
احتمال كبير لو استمرت الامور كده امشي في شهر يناير

هتروح فين يا معلم ؟
انا اي مكان يتمناني واقدر العب في اي فريق

ايه الثقة دي كلها انت يادوب 10 اهداف ؟
العب الاول وبعدها حاسبوني ... لكن انا حظي قليل مع الزمالك

حظك قليل مع كل المدربين يا جعفر؟
بص.. انا مبخفش من حد الا من ربنا سبحانه وتعالى وعلشان كده ماليش حظ في الزمالك لكن ان شاء الله ربنا ينصفني وينصرني علشان ربنا عادل وانا مبحبش الظلم وفيه ناس بتظلمني وده بيعصبني وبيعرضني للعقاب
اخر كلام دار بينى وبين جعفر كان مساء الجمعة..ساعتها عاتبته وعاتبت شقيقه بسبب هزاره مع الصحفيين..ودار بينى وبينه نقاش حاد جدا انتهى بقوله انه بيهزر معايا وان الزمالك فى دمه..بالصدفة قابلت محسن ابراهيم وفضفضت معاه..ومساء اليوم التالى كان الخبر باستبعاد جعفر من معسكر مباراة الاهلى ومابدهاش بقى قررت رفع الحوار وانا على ثقة اننا حننقسم ونختلف ومنا من سيتعاطف مع اللاعب ومنا من سيطالب برحيله..والاختلاف سمة من سمات الانسان الزملكاوى